அன்பு தேவன் என் தந்தை

பல்லவி

இயேசுவை நாம் எங்கே காணலாம்?

அவர் பேசுவதை எங்கே கேட்கலாம்?

அனுபல்லவி

பனி படர்ந்த மலையின் மேலே பார்க்க முடியுமா?

கனி நிறைந்த சோலை நடுவே காண முடியுமா?

1

ஓடுகின்ற அருவியெல்லாம் தேடி அலைந்தேனே

ஆடுகின்ற அலைகடலில் நாடி அயர்ந்தேனே

தேடுகின்ற என் எதிரே தெய்வத்தைக் காணேனே

பாடுபடும் ஏழை நான் அழுது வாடினேனே

— இயேசுவை

2

வானமதில் பவனி வரும் கார்முகில் கூட்டங்களே

வந்தருளும் இயேசுவையே காட்டி மாட்டீரோ

காலமெல்லாம் அவனியிலே வீசும் காற்றே நீ

கர்த்தர் இயேசு வாழுமிடம் கூறிட மாட்டாயோ

— இயேசுவை

3

கண்ணீரிரண்டும் புனலாக நெஞ்சம் அனலாக

மண்டியிட்டு வீழ்ந்தேன் நான் திருமறை முன்பாக

விண்ணரசர் அன்புடனே கண்விழிப்பாய் என்றார்

கண்விழித்தேன் என் முன்னே கர்த்தர் இயேசு நின்றார்.

— இயேசுவை