இயேசு அருள் நாதனே

பல்லவி

இயேசு அருள் நாதனே!

தாசன் மேலுன்னாவி யூற்றத் தாள் பணிந்தேனே!

கண்ணிகள்

1. மாசற்ற உம் இரத்தத்தாலென் மனம் சுத்திசெய்யுமேன்!

நேசரே உம் நிஜரூபம் நேரில் காணச் செய்யுமேன்!

நீசன் மனம் மாறினதால் பாசமென்னில் கூருமேன்! – இயேசு

2. உம்மோடு சிலுவையி லொன்றாயறையப்பட்டேனே!

இம்மையிலுமைப் பிரிந்து இருக்கவுமாட்டேனே!

தம்மையல்லாமல் ஒன்று மிந்தத் தாரணியில் வேண்டேனே! – இயேசு

3. தணிந்திடாத் தாகமெனில் தாமெழுப்பி வையீரோ?

பணிந்த என்னுள்ளத்தில் நீர் வந்து பள்ளி கொள்ளீரோ

துணிந்து வந்த என்னோடு தூயா வாசஞ் செய்யீரோ? – இயேசு

4. எனது சித்த மனைத்தும் உமதாயிருக்கட்டும்!

தமது ஒளியில் நானும் வெளிச்சமே காணட்டும்!

தினம் பரிசுத்தனாக உமைத் துதி செய்யட்டும்! – இயேசு