விசுவாசமே, வேத பிரமாணமே

பல்லவி

விசுவாசமே, வேத பிரமாணமே – நம்

இரட்சண்ய சேனையின் விசுவாசமே – இது

பழைய ஏற்பாடும், புதிய ஏற்பாடும்

அடங்கிய சத்திய வேதாகமமே

சரணங்கள்

1. தேவ ஏவுதலால், அருளப்பட்டதென்றும்

கிறிஸ்தவ விசுவாச கிரியையுமான

தெய்வீகச் சட்டம் அடங்கினதென்றும்

மெய்யாகவே விசுவாசிக்கின்றோம் – விசு

2. எல்லாவற்றிற்கும் சிருஷ்டிகராயும்

பாதுகாவலரும், ஆள்பவருமான

வணக்கத்திற்குரிய பூரண தேவன்

ஒருவரே என விசுவாசிக்கின்றோம் – விசு

3. தத்துவம் தன்னில் பிரியாதவரும்

வல்லமை மகிமை சமமான

பிதா, குமாரன் பரிசுத்த ஆவி

திரித்துவரென விசுவாசிக்கின்றோம் -விசு

4. கர்த்தராம், கிறிஸ்துவின் மனுஷீக தெய்வீக

தன்மைகள் அடங்கி இருப்பதனால்

மெய்யாக தேவனாய், மெய்யாக மனிதனாய்

இருக்கிறார் என விசுவாசிக்கின்றோம் -விசு

5. ஆதிப்பெற்றோர்கள் நிர்மலராக

சிருஷ்டிக்கப்பட்டு கீழ்ப்படியாது

பரிசுத்தம் இழந்து பரமனின் கோப

ஆக்கினையடைந்தார் விசுவாசிக்கின்றோம் – விசு

6. விருப்பமுள்ளோ ரெவராயினும் அவர்கள்

இரட்சிப்படைய கர்த்தர் கிறிஸ்தேசு

பாடு மரணத்தால் – பாரிதை மீட்க

பலியானார் என விசுவாசிக்கின்றோம் – விசு

7. தேவனுக்கு முன் மனஸ்தாபமுடன்

இயேசு கிறிஸ்துவில் விசுவாசமும்

பரிசுத்த ஆவியால் வரும் மறுபிறப்பும்

இரட்சைக்குத் தேவை விசுவாசிக்கின்றோம் – விசு

8. கிறிஸ்துவில் உள்ள விசுவாசத்தால்

கிருபையால் நீதிமான் ஆகின்றோம்

அவரில் விசுவாசித்தால் தன்னிலே அந்த

சாட்சி உண்டென்று விசுவாசிக்கின்றோம் – விசு

9. இரட்சிப்பில் நிலைத்தல் கிறிஸ்துவிலுள்ள

இடைவிடா விசுவாசம் கீழ்ப்படிதல்

இவைகளில் சார்ந்து இருக்கிறதென்று

இதயமதில் விசுவாசிக்கின்றோம் – விசு

10. பூரண சுத்தி, விஸ்வாசியின் சிலாக்கியம்

கர்த்தராம் கிறிஸ்து வருமளவும்

ஆவி, ஆத்மா, சரீரம் அழுக்கற

காக்கப்படும் விசுவாசிக்கின்றோம் – விசு

11. அழியாது ஆத்மா உயிர்த்தெழும் சரீரம்

அகிலம் முடிவில் நியாய விதி உண்டு

நீதிமானின் ஆனந்தம் துன்மார்க்கரின் ஆக்கினை

நித்தியம் என விசுவாசிக்கின்றோம் – விசு