வளர்ந்தே பெருகுக என்றே

1. வளர்ந்தே பெருகுக என்றே – உளம்

மகிழ்ந்தே புகழ்ந்திட வாரீர்

தளர்ந்தே சோர்வுறும் கால்களே – பலம்

அடைந்தே நடந்திட வாரீர்

பல்லவி

பெருகுவோம் – வளர்ந்து

பெருகுவோம் – தேவன்

அருளும் ஆவியின்

அருமையாம் ஒளியில் – வளர்ந்தே பெருகுவோம்

2. இருநூறாண்டுகள் இறைவன் – நெல்லைத்

திருச்சபை வளர்ந்திட நேர்ந்தார்

வரும்பல ஆண்டுகள் எல்லாம் – இன்னும்

பெருகிட அருள்வரம் ஈவார்

3. பிரிவினை எழுந்திடும் நேரம் – நம்மைக்

கரிசனை யோடவர் இணைத்தார்

உரிமையாய் ஒருமையில் வளர – அவர்

பரிவுடன் தினம் நடத்திடுவார்

4. தூய்மையில் தவறிய வேளை – நம்மைத்

தூயவர் தூக்கியே எடுத்தார்

தாய்மையின் கரம் கொண்டு மேலும் – நம்மைத்

தாங்கியே தினம் அணைத்திடுவார்

5. ஒளியென உலகினில் வந்தார் – நம்மை

ஒளியென விளங்கிட அழைத்தார்

ஒளிதரும் தீபங்களாக – என்றும்

ஒளிர்ந்திட ஓடியே வாரீர்

வளர்ந்தே பெருகுக என்றே – Valaranthe peruguga entre