உனக்கொத்தாசை வரும் நல் உயர்

நல் உயர் பருவதம் இதோ

பல்லவி

உனக்கொத்தாசை வரும் நல் உயர் பருவதம்,-இதோ!

அனுபல்லவி

தினமும் மனது நொந்து சிந்தை கலங்குவோனே. – உன

சரணங்கள்

1. வானம் புவி திரையும் வகுத்த நன்மைப் பிதாவின்

மாட்சிமையின் கரமே வல்லமையுள்ள தல்லோ? – உன

2. காலைத் தள்ளாடவொட்டார், கரத்தைத் தளரவொட்டார்;

மாலை உறங்கமாட்டார், மறதியாய்ப் போக மாட்டார். – உன

3. கர்த்தருனைக் காப்பவராம், கரமதில் சேர்ப்பவராம்;

நித்தியம் உன்றனுக்கு நிழலாயிருப்பவராம். – உன

4. பகலில் வெயிலெனிலும், இரவில் நிலவெனிலும்,

இகல் தருவதுமில்லை, இன்னல் செய்வதுமில்லை. – உன

5. தீங்கு தொடராதுன்னை, தீமை படராதுன்மேல்;

தாங்குவார் தூதர் கோடி, தாளிடறாதபடி. – உன

6. போக்கும் ஆசீர்வாதமாம், வரத்தும் ஆசீர்வாதமாம்;

காக்கைக் குஞ்சுகள் முதல் கதறி நம்பிவிடுமே. – உன

7. துன்ப துயரத்திலும் துக்க சமயத்திலும்,

இன்பமுறும் பொழுதும் எல்லாம் உனக்கவரே. – உன