தந்தானைத் துதிப்போமே திருச்

தந்தானைத் துதிப்போமே – திருச்

சபையாரே, கவி – பாடிப்பாடி.

விந்தையாய் நமக்கனந்தனந்தமான,

விள்ளற்கரியதோர் நன்மை மிக மிகத் — தந்தானைத்

1. ஒய்யாரத்துச் சீயோனே – நீயும்

மெய்யாகக் களிகூர்ந்து நேர்ந்து,

ஐயனேசுக்குனின் கையைக் கூப்பித் துதி

செய்குவையே, மகிழ் கொள்ளுவையே, நாமும் — தந்தானைத்

2. கண்ணாரக் களித்தாயே – நன்மைக்

காட்சியைக் கண்டு ருசித்துப் புசித்து

எண்ணுக்கடங்காத எத்தனையோ நன்மை

இன்னுமுன்மேற் சோனா மாரிபோற் பெய்துமே — தந்தானைத்

3. சுத்தாங்கத்து நற்சபையே – உனை

முற்றாய்க் கொள்ளவே அலைந்து திரிந்து

சத்துக் குலைந்துனைச் சத்தியாக்கத் தம்மின்

ரத்தத்தைச் சிந்தி எடுத்தே உயிர் வரம் — தந்தானைத்

4. தூரம் திரிந்த சீயோனே – உனைத்

தூக்கியெடுத்துக் கரத்தினிலேந்தி,

ஆரங்கள் பூட்டி அலங்கரித்து நினை

அத்தன் மணவாட்டி யாக்கினது என்னை! — தந்தானைத்

5. சிங்காரக் கன்னிமாரே, – உம்

அலங்காரக் கும்மி அடித்துப் படித்து,

மங்காத உம் மணவாளன் யேசுதனை

வாழ்த்தி வாழ்த்தி ஏத்திப் பணிந்திடும் — தந்தானைத்