பரத்திலே நன்மை

பல்லவி

பரத்திலே நன்மை வருகுமே,-நமக்கு நித்திய

பாக்கியம் மிகப் பெருகுமே.

அனுபல்லவி

பரத்திலே சிறந்த ஜீவ பதி வளர் கிரீடம் அதைச்

சிரத்திலே அணிய, யேசு

தேவனைப் பணிந்து போற்றுவோம். – பரத்

சரணங்கள்

1. வருத்தம், பசி, தாகம், சாவில்லை;-அலறுதலும்

மனத்துயர், இரவு சாபம் இல்லை;

அருணன், மதி வேண்டியதில்லை;-துன்மார்க்கர் எனும்

அசுத்தர் வந்து சேர்வதும் இல்லை;

சருவ மகிமை யுடைய தந்தை

பரனொடு கிறிஸ்தின் திரு

அருள் மிகச் சிறந்த ஒளி

தெளிவுற ப்ரகாசம் ஆக்குமே – பரத்

2. ஆட்டுக் குட்டியின் ரத்தத்தில் தோய்த்து,-வஸ்திரங்கள் தமை

அழுக்கறப் பிரகாசமாய் வெளுத்து,

வாட்டங்கள் அனைத்தையும் தீர்த்து,-கண்ணீர் அறவே

மகிமையின் கரத்தினால் துடைத்து,

கூட்டி ஜீவ புனலிடத்தில்

கொண்டு மேய்த் தருள் முடியைச்

சூட்டியே அனந்த பாக்கிய

சுகத்தில் வாழ்ந்திருக்கச் செய்குவார். – பரத்

3. பங்கம் இன்றி மகிழ்ந்து வாழலாம்;-பேர் ஒளி துலங்கும்

பரம கிருபாசனத்தைச் சூழலாம்;

சங்கை யோ டரசிருந்தே ஆளலாம்;-பராபரன் தன்

சமூக ப்ரபைதனிலே வாழலாம்;

மங்கை சீயோன் மகளின் பிரிய

மன்னவன் தேவாட்டுக் குட்டியின்

இங்கிதக் கல்யாணப் பந்தியின்

இருந்து நித்ய விருந்தால் மகிழலாம். – பரத்