பாவி பரமசுதன் தாவி

பல்லவி

பாவி பரமசுதன் தாவிஉனைத் தயவாய் கூவி

அழைக்கிறார் இதோ வாராயோ – ஓ

அனுபல்லவி

பூவின் பாவப் பாரத்தை மேவிச் சுமந்து தீர்த்த

தேவாட்டுக்குட்டி இதோ பார் பார் பார் – ஓ பாவி

1. ஜென்மபாவத்தினோடு கன்மபாவமு முன்னை

சின்னப்படுத்திதைப் பார் பார் பார் – உனின்

நன்மை ஏதுமில்லாத தன்மை அதை அறிந்து

நன் மணவாளனேசுவைச் சேர் சேர் சேர் – ஓ பாவி

2. சிற்றொளி தீபம் சுற்றிப்பறந்து நிற்கும்

சிற்றுயிர் புட்கள் தனைப்போலவே – உனைச்

சுற்றி உலகளிக்கும் சிற்றின்பமான சுகம்

தொற்றிப் பாவி நீ கெட்டாய் சாலவே – ஓ பாவி

3. எத்தனை தானதர்மம் நித்தம் பூசைபலிகள்

அத்தனையாலும் பாவம் தீராதே – பரி

சுத்தன் ஏசுவின் திருரத்தம் பாவக்கறையை

சுத்திகரித்திடும் நீ சேராயோ – ஓ பாவி

4. தந்தைப் பிதா தமது சொந்தக் குமாரன் தனை

தந்து உலகினை புரந்தாரே – நீயும்

சொந்த சேயனாகவே உந்தன் விசுவாசத்தால்

சொந்தம் உண்டாகுமென்று பகர்ந்தாரே – ஓ பாவி

5. நீடிய பாவமன்னிப்போடுமே பரிசுத்தம்

நித்திய ஜீவனுமுன் பங்காமே – இன்பம்

நாடி ஜீவகிரீடம் சூடிப் பராபரனைப்

பாடி மகிழ்வதுமுன் பங்காமே – ஓ பாவி