பாலர் ஞாயிறிது

பல்லவி

பாலர் ஞாயிறிது, பாசமாய் வாரும்,

பாடி யேசு நாமம் பணிந்து போற்றும்.

அனுபல்லவி

தாலந்தை புதைத்திடாமல் தாமதமே பண்ணிடாமல்

ஞாலமீதிறங்கி வந்த சுவாமி யேசு அன்பை எண்ணிப் – பாலர்

சரணங்கள்

1. பாலர் சங்கத்தாலே மாட்சிமை பெற்றோம்,

பாலர் நேசர் பதம் பணியக்கற்றோம்,

பாரில் ஜோதி வீசுகின்ற பரிசுத்த வேதம் கற்றோம்,

ஊரில் எங்கும் கார்ட் பஞ்சாங்கம் ஓதும் பாலியர் நேசன் கண்டோம். – பாலர்

2. தேடி வந்தலையும் தேசிகருண்டு,

பாடி ஆர்ப்பரிக்க பாலர் பாட்டுண்டு,

கூடி வந்து ஆனந்திக்கக் கூட்டப்பண்டிகையுமுண்டு,

நாடி மீட்பர் பாதம் பாலர் தேட எல்லா ஏதுமுண்டு. – பாலர்

3. இன்று மட்டும் நம்மை ஏந்தி வந்தாரே,

இன்னும் நித்யமும் பாதுகாப்பாரே,

அன்பின் சங்கம் இதைக்கொண்டு ஆத்மநேசர் செய்து வரும்

எண்ணி முடியா நன்மையை ஏகமாக எண்ணிக் கொண்டு. – பாலர்