நித்தியானந்தத்தை நாடு

பல்லவி

நித்தியானந்தத்தை நாடு – பர

நிர்மல சுகந்தேடு மனமே

அனுபல்லவி

சத்திய மார்க்கந்தனிலே கூடு

சற்சன சங்கத்தினோடுறவாடு

1. இந்திர ஜாலம் உலக வைபோகம்

இன்றைக்கிருப்பதுவோ – சந்தேகம்

அந்தர மின்னல்போல் அழியும் இத்தேகம்

ஐயோ! அதனுடனுனக்கென்ன சிநேகம் – நித்

2. தன தானிய முதலான சம்பத்து

சாஸ்வதமோ? அதற்காயிரந் தத்து

தினமும் கவலைகள் விளைத்திடும் வித்து

சீச்சீ அதனை விரும்பல் விபத்து – நித்

3. மெய்யே ஒன்றுக்கு முதவாத பாண்டம்

மிருகாதிகள் சூழ் மாமிசப் பிண்டம்

மெய்யே இதற்கிங்கு நித்திய கண்டம்

புண்ணியன் பாதமுனக் காயிரம் தண்டம் – நித்

4. காண்பதெல்லாம் நிலை அல்ல அநித்யம்

காய மிறந்திட வேண்டு மகத்தியம்

வீண் பொருள் மீதுனக் கென்ன பைத்தியம்?

வேதாகமமே சொல்வது சத்தியம் – நித்