காலமே தேவனைத் தேடு

காலமே தேவனைத் தேடு - ஜீவ

காருண்யர் பாதம் பணிந்து மன்றாடு

சீலமுடன் பதம் பாடிக்கொண்டாடு

சீரான நித்திய ஜீவனை நாடு

1. மன்னுயிர்க்காய் மரித்தாரே - மனு

மைந்தனென நாமம் வைத்திருந்தாரே

உன் சிருஷ்டிகரை நீ உதயத்திலெண்ணு

உள்ளங்கனிந்து தனி ஜெபம் பண்ணு

2. பாவச் சோதனைகளை வெல்லு - கெட்ட

பாருடல் பேயுடன் போருக்கு நில்லு

ஜீவ கிரீடஞ் சிரத்திலணியச்

சிந்தனை செய் மனுவேலனைப் பணிய

3. சிறுவர்கள் என்னிடஞ் சேரத்தடை

செய்யாதிருங்களென்றார் மனதார

பரலோக செல்வமவர்க்குப் பலிக்கும்

பாக்கியமெல்லாம் பரந்து ஜொலிக்கும்

4. வேலையுனக்குக் கைகூட - சத்ய

வேதன் கிருபை வரத்தை மன்றாட

காலை தேடுவோர் எனைக் கண்டடைவாரே

கண்விழித்து ஜெபஞ் செய்யுமென்றாரே