ஜெபம் மறவாதே நேசனே

ஜெபம் மறவாதே நேசனே

பல்லவி

ஜெபம் மறவாதே நேசனே-எக்காலமும் நீ!

சரணங்கள்

1. ஜெபம் பரமனுடன் பேச்சு;

தேவை யெல்லாம் அத்தா லாச்சு;

தப விசுவாசி மூச்சு;

தகாதெலாம் அத்தால் போச்சு. – ஜெப

2. அம்பரன் கற்பனை நோக்கு;

அவரதருமை வாக்கு;

நம்பிச் சந்தேகம் போக்கு;

நலம் வரத் தீமை நீக்கு. – ஜெப

3. பேயை ஜெபத்தோடு வென்ற,

பிரிய நாமமுங் கொண்ட,

நேய சுதன்தனைத் தந்த,

நின் மலனுக்கே யுகந்த. – ஜெப

4. விசுவாச நேசத்தோடு

மிகும் பக்தியோடு நாடு;

நிச்சயமாய் பரனைத் தேடு;

நேர்மையுடனே ஓடு. – ஜெப

5. பகலுடன் இரவிலும்,

பணிவுடன் குறைவிலும்,

திகிலிலும் மகிழ்விலும்,

செல்வம் வறுமையிலும். – ஜெப

6. தேவ அரசாட்சிக்காக

ஜெபி, உன்றன் குறைபோக,

ஆவலுடன் பிறர்க்காக

அன்புடன் ஜெபிப்பா யாக. – ஜெப