தேவா இவ்வீட்டில் இன்றே மேவி எழுந்து

பல்லவி

தேவா, இவ்வீட்டில் இன்றே மேவி எழுந்து வரவே;-தயை

செய்வாய், எமது கோவே!

சரணங்கள்

1. மூவர் ஒருவரான தேவா;-கிறிஸ்துநாதா,-எங்கள்

முன்னவா, சத்ய வேதா!

பூவில் எமக்குதவி யாருமில்லை, எம் தாதா,-யேசு

புண்ணியனே, மா நீதா!-இங்கு

நண்ணுவாய், மெய்ப் போதா;-தயை

பண்ணுவாய், வினோதா!

மேவி உனதருளை ஈவாய் இவ்வீட்டின் மீது,

ஜீவனே, யேசு கோனே,-ஏழைப்

பாவிகள் மீட்பன் தானே. – தேவா

2. விந்தையுடன் களிப்பும் சந்தமுடன் உண்டாக,-அதி

மேன்மையுடன் சிநேகம்

அந்தமுடன் பெருகி எந்தப் பாவமும் ஏக.-என்றும்

அத்தனோ டுற வாக,-ஜெப

துந்துமிகள் முழங்க,-ஐக்யம்

பந்தமுடன் இலங்க,

தந்தைப் பரனே, இன்று உன்றன் அருள் நிறைவாய்ச்

சொந்தமுடன் ஈவாயே,-இவர்

சந்ததம் வாழ நீயே. – தேவா

3. இங்கு வசிக்கும் மட்டும் துங்கன் மொழிக் கிசைந்தே,-பரன்

இஷ்டப்படி நடந்தே,

அங்கம், மனது யாவும் பங்கம்இன்றித் தொடர்ந்தே,-இவர்

அனுதினமும் மகிழ்ந்தே,-உயர்

அம்பர வீட்டில் சேர்ந்து,-மிகு

கெம்பீரமாக வாழ்ந்து,

புங்கமுடன் நிதமும் தங்கி யேசு பரனில்

இங்கிதமாய்க் கொண்டாட,-நிதம்

மங்களக் கவி பாட. – தேவா