தேவா எனைமறக்காதே

பல்லவி

தேவா எனைமறக்காதே,-இந்தச்

சிறியன் படுந்துயரில் தூரநிற்காதே.

அனுபல்லவி

நேயா உனையன்றி நீசனுக்கார் கதி?

தூயா கிருபைகூர், நான் மகாதோஷி. – தேவா

சரணங்கள்

1. வானுலகோர்தொழும் நாதா!-இந்த

மானிடர்கரையேற வந்தசகாயா!

காலைமாலைகள்தோறும் கரைந்து உருகுகின்ற

கர்மசண்டாளனைக் கண்ணோக்க லாகாதா? – தேவா

2. பாவியின் மேலிரங்கையா!-பொல்லாப்

பாதகனைக்கைவிடாதே நலமெய்யா!

தாரணிதன்னில் தவிக்குமிவ்வேழையைத்

தாங்கியாதரித்துந்தன் தயைபுரி ஐயா! – தேவா

3. என்மீறுதல் நினையாதே, எந்தன்

இளமையின் பாவத்தை மனதில்வையாதே.

உன்பாதஞ்சேர்ந்தேன், உவந்தேனுனையடைந்தேன்,

நின்பாதந்தானே நிலையாகக்கண்டேன். – தேவா

4. நெருக்கப்படுகிறேன் தேவா,-என்னை

உருக்கமாய்ப் பாராய், கிறிஸ்தேசுநாதா!

இரக்கம் வைத்தென்றனின் குறைதனை நீக்கு,

என்னை ஆட்கொண்டவா, இயேசு சர்வேசா! – தேவா

5. சரணம், சரணம் சருவேசா!-இந்தத்

தருணம், தருணம் உன்றன் கருணை கூர் நேசா!

மரணவேளையிலும் நடுத்தீர்வை தினத்திலும்

மாபாதகன் எனை ரட்சியாய் நாதா! – தேவா