அருமையுற நீ இறங்கி

1. அருமையுற நீ இறங்கி அடியனுள மீது தங்க,

அணுவளவிலாது பங்கம்-அகன்றோடும்;

அருளொளி அன்பே யுறைந்து அதிகவுயர்வாய் வளர்ந்த

அகமுழுதுமே நிறைந்து-வழிந்தோடும்.

2. திருவரசுன் சீர்குணங்கள் இனிய திருவாசகங்கள்

திவிய வரமாக வந்து-எனதாகும்;

தினமுமெழிலாயிலங்கி எனதகமுமே கனிந்து

சிறுமை செயும் ‘நான்’ மறைந்து-பறந்தோடி.

3. மருவு கிறிஸ்தேசுன் அன்பும் அமருமழகான இன்பும்

மலர் முக சந்தோஷ பண்பும்-சுடரா

மகிமையும் நின்னோடுவந்த எனதிதயமே நிரந்து

வளமை வரவே விளைந்து-நிலையாக.

4. உரிமையுடனே உவந்து மனமதியெலாங் கவர்ந்து,

உனதடிமையாய்ப் பரிந்து-எனையாளாய்!

உனதசுனையாய்ச் சுரந்து அடியருளமே விரிந்து,

உதவு நதியாக வந்த-பெருமானே!