அந்தோ சிலுவைப் பவனி

சரணங்கள்

1. அந்தோ சிலுவைப் பவனி பார் – நமது

ஆண்டவர் படுந்துயர் ஆறுமோ – நாம்

அழுதாலுந்தான் தீருமோ – குரு

சன்றி மீட்பு ஒப்பேறுமா – சகி சகி

2. தோளில் பாரம் அழுந்தவே – அவர்

தேய்ந்து கீழே விழுகிறார் – ஐயோ

தூக்கிவிடுவார் இல்லையோ – மா

தோஷி என்னால் இத்தொல்லையோ – சகி சகி

3. தூக்கென்றவரை அதட்டுறான் – ஒரு

தோஷி முறுக்கிப் பிதற்றுறான் – அங்கே

துடுக்காய் சவுக்கை சுழற்றுறான் – ஒருவன்

தொந்தரை செய்தே அலட்டுறான் – சகி சகி

4. மெல்ல இயேசு நடக்கிறார் – வேர்த்து

மெய் சோர்ந் துடைந்து சடைக்கிறார் – தம்மைப்

பலியாய் விருப்புடன் படைக்கிறார் – எந்தன்

பாவக் கடன்களை அடைக்கிறார் – சகி சகி

5. மாதா ஏங்கித் தேம்புறாள் – நன்மை

வாங்கினோர் புலம்பி ஏங்குறார் – சீமோன்

மதிசோர்ந்து குருசைத் தாங்குறான் – ஐயோ

மருகி யோவான் முகம் வீங்குறான் – சகி சகி

6. கல்வாரி மலையில் ஏறுகிறார் – மெய்

கருகி அன்பர் சோர்கிறார் – சாலேம்

மாதர் புலம்பி அழுகிறார் – அவர்க்

காறுதல் மொழிகள் கூறுகிறார் – சகி சகி

7. சோலையில் வந்த பாவத்தால் இயேசு

சாலையின் வழியே போகிறார் – அலங்

கோலமாகி என்னால் சாகிறார் – தேவ

கோபாக்கினையில் வேகிறார் – சகி சகி