அன்பர்க்கருள் புரிவோனை

1. அன்பர்க்கருள் புரிவோனை, ஆதியாய் நின்ற சீமானை,

துன்பமகற்றிடுங் கோனை, தூயமனமுளத்தானை,

பொன் பொலியும் பெருமானை, பூரண நேசமுற்றானை,

இன்பமளித்திடுந்தேனை, இலங்குந்திருமேனி கண்டேன்;

கண்டேன் அவர் திருத்தேகம்; கல்வாரி மலைதனில் கண்டேன்.

2. சத்தியவாசகப்போதன், சாற்று முரைப்பிடிவாதன்,

பத்திசேர் சற்பிரசாதன், பாவமகற்றும் பொற்பாதன்,

எத்திசையோர் தேடும் நாதன், இந்நிலம் வந்தமா நீதன்,

முத்தியளித்திடு வேதன், மூவாதிருமேனி கண்டேன்;

கண்டேன் அவர் திருத்தேகம்; கல்வாரி மலைதனில் கண்டேன்.

3. பாவமகற்று பகாரன், பசாசுகளுக்கபகாரன்,

ஜீவனளிக்கும் உதாரன், தீவினைபோக்குங் குமாரன்,

சாவையழித்தமாவீரன், தாரணியோர்க்குபகாரன்,

தேவ சுரரேத்துந்தீரன், சோதி திருமேனி கண்டேன்;

கண்டேன் அவர் திருத்தேகம்; கல்வாரி மலைதனில் கண்டேன்.

4. ஆதியும் அந்தமுமான, அல்பா ஒமேகாவுமான,

நீதி இரக்கமுமான, நித்திய ஜீவனுமான,

ஓதிய வேதமுமான, உத்தம மார்க்கமுமான,

மேதினியிலுருவான மீட்பர் திருமேனி கண்டேன்;

கண்டேன் அவர் திருத்தேகம்; கல்வாரி மலைதனில் கண்டேன்.